Gallar trompaðir af kostum

Ég hugsa að ég verði seint talinn hæglátur og fyrirferðalítill einstaklingur. Mér varð hugsað til galla minna í dag komst að því að þeir eru margir hverjir stórkostlegir. Svo var mér hugsað til kostanna og áttaði mig á því að þeir eru jafn stórkostlegir, jafnvel stórkostlegri. Ég ákvað að láta þar við sitja með þá pælingu alla og fékk mér harðfisk.

Undarlegt er þetta með harðfiskinn yfir höfuð. Mér finnst hann í sjálfu sér ekkert sérstaklega góður. Ég kaupi hann þó iðulega og borða. Finnst mér hann kannski bara góður. Afhverju set ég þá upp svip og anda með nefinu þegar ég neyti hans. Afhverju borða ég hann yfirleitt. Er harðfiskur kannski vanabindandi. Eða er það ofurþjóðlegt yfirbragð hans og hollusta sem gerir það að verkum að ég borða hann. 

Ég veit það ekki.

Annars er það að frétta af mér að tilvera mín er í senn margslunginn, óvænt , spennandi og yndisleg.

Ég er skotinn í stelpu.